{*titulo}

{*titulo}

PÓDENSE ENVIAR CANDIDATURAS ATA O 26 DE FEBREIRO

Aberta a VI edición do Premio José Couso de Liberdade de Prensa

[15/01/2010] A Galería Sargadelos de Ferrol acolleu esta mañá a presentación da VI edición do Premio José Couso de Liberdade de Prensa, organizado polo Colexio Profesional de Xornalistas de Galicia (CPXG) e o Club de Prensa de Ferrol, en colaboración con Caixanova.

O Presidente do Club de Prensa de Ferrol, Xan Morales Somoza, anunciou a apertura do prazo, ata o 26 de Febreiro, para presentar candidaturas, que se anunciarán como definitivas o día 2 de marzo. Lembrou que a característica principal do premio é que o xurado son os propios xornalistas, que votarán por correo electrónico do 3 de marzo e o 6 de abril. O 15 de abril terá lugar a presentación do fallo en Ferrol e o 7 de maio se realizarán os actos de entrega, que contarán unha vez máis co Concerto pola Liberdade da Real Filharmonía de Galicia, "un dos dous únicos concertos do mundo pola liberdade de prensa". Por último, quixo aproveitar para expresar o apoio do Club de Prensa aos xornalistas condenados da Cadena SER.

O representante de Caixanova na Comarca de Ferrol, José Ulfe Bugallo, que expresou a satisfacción da entidade por que o premio celebre a sexta edición. Ulfe Bugallo lembrou que desde os comezos Caixanova entendeu que debía implicarse neste proxecto, mesmo en épocas de crise coma esta, polo que mostrou a intención da caixa de seguir apoiando o premio.

Finalmente, tomou a palabra o Decano do Colexio Profesional de Xornalistas de Galicia, Xosé Manuel Pereiro, que comezou agradecendo o apoio de Caixanova "nestes momentos de escasez" e lembrou que o premio é unha lembranza á memoria de José Couso e un apoio á súa familia cando o seu asasinato segue sen se esclarecer.

Pereiro salientou que, "aínda que non vivimos nunha sociedade na que os xornalistas poñen en perigo a súa integridade física, si se dan situacións nas que a liberdade de prensa está sendo cuestionada", como no caso dos xornalistas da Cadena Ser, Rodolfo Irago, colexiado do CPXG, e Daniel Anido. Por isto, recordou que o Colexio de Xornalistas xa lles mostrou o seu apoio, sendo a primeira entidade en condenar a sentenza. "A crise", afirmou, "é outro factor que inflúe sobre a liberdade de prensa", dado que os despedimentos, os recortes e as présas na elaboración de novas non garanten unha información de calidade para a cidadanía.

Poderán ser presentadas candidaturas ao premio José Couso de xornalistas sen distinción de lugar de orixe. Calquera colexiado do CPXG ou socio do Club de Prensa de Ferrol pode entregar unha proposta argumentada de. Igualmente, calquera persoa ou organización vinculada ó xornalismo está facultada para facer chegar a súa candidatura. O envío de candidaturas, con argumentación e currículum vitae, realizarase ao seguinte correo electrónico: premiocouso@xornalistas.com.