Javier Ortiz, talento y oficio de un periodista é unha compilación de artigos do falecido xornalista Javier Ortiz feita polo editor Mikel Iturria e editada por Ediciones Akal. Ademais da selección de artigos, o libro conta con tres perfis de Ortiz obra de Garbiñe Biurrun, David Fernàndez e Isaac Rosa.

A Fundación Vicente Risco organiza, coa colaboración do Colexio Profesional de Xornalistas de Galicia, varias presentacións do libro en Galicia, que contarán coa participación do editor Mikel Iturria e de Xosé Rodriguez Díaz, da Fundación Vicente Risco. En concreto, o xoves 19 de setembro ás 20:30 terá lugar a presentación no Salón Nobre do Liceo de Ourense (Rúa Valentín Lamas Carvajal, 5), con acompañamento musical de José Luis Fernández Carnicero. Ao día seguinte, venres 20 de setembro, o libro presentarase na Libraría Paz de Pontevedra (Rúa da Peregrina, 19), a partir das 20:00 horas. 

Neto dun emigrante ourensán, Javier Ortiz naceu en Donostia en 1948. Comezou a súa actividade xornalística aos dezaoito anos, en publicacións clandestinas na ditadura franquista, polo que foi arrestado en varias ocasións. Exiliado en Bordeos e en París varios anos, regresou a España á morte de Franco, formou parte da Platajunta e fundou a revista Saida, que foi varias veces secuestrada. En 1985 comezou a traballar como redactor xefe da revista Mar. Pedro J. Ramírez ofreceulle colaborar na fundación de El Mundo, onde exerceu varios postos de dirección. En 2000 deixou os cargos neste xornal e comezou a colaborar de forma externa con dúas columnas semanais. Posteriormente traballou como comentarista en Radio Euskadi e ETB e desde 2007 como columnista no diario Público. En 2009 faleceu en Aigües (Alacante).