O grupo de xornalistas mexicanos Colectivo 23 de marzo, xunto coas organizacións internacionais Bellingcat, Forbidden Stories e o Centro Latinoamericano de Investigación Periodística crearon en 2018 o Proxecto Miroslava, co obxectivo de pescudar sobre as circunstancias do asasinato no 2017 de Miroslava Breach, unha xornalista mexicana que investigaba a chamada "narcopolítica". Logo dun ano, a investigación comeza a presentar as súas primeiras conclusións, denunciando fallos na investigación do asasinato ou revelando a relación doutras mortes co caso. 

Nada en Chinipas, no estado de Chihuahua, en 1963, Miroslava Breach exerceu de xornalista máis de 20 anos, destacando os seus traballos para La Jornada e El Norte de Ciudad Juárez. As súas investigaciónstrataron especialmente teemáticas relacionadas coa defensa dos dereitos humanos das comunidades indíxenas e conflitos de materia ambiental, así como sobre feminicidios e desaparicións forzadas. O 23 de marzo de 2017, ás sete da mañá, cando Breach subía á súa camioneta para levar o fillo á escola, recibiu oito impactos de bala. Aínda que existe unha investigación xudicial sobre a súa morte, numerosos colectivos denuncian que seguen a existir cabos soltos na investigación, e para investigalos naceu o Colectivo 23 de marzo. 

O de Miroslava Breach é apenas un dos casos máis mediáticos dos asasinatos de xornalistas en México, un dos países máis mortíferos para os profesionais dos medios de comunicación. Segundo a organización Article 19, xa son 10 os xornalistas mexicanos asasinados neste 2019, e un total de 131 desde o ano 2000. O último deles, Nevith Condés Jaramillo o pasado 25 de agosto. Organizacións internacionais como a FIP ou Reporteiros Sen Fronteiras teñen reclamado ao goberno mexicano que tome medidas para frear este masacre de comunicadores. 

CPXG