Este venres 10 de xaneiro nacía As Nosas, un xornal dixital dedicado ao deporte feminino e "pensado para darlle o protagonismo que a muller no deporte en Galicia reclama e merece". Editado por Ártabra Comunicación, o novo medio en galego estará dirixido pola xornalista Silvia Carregal e conta cun equipo conformado por tres redactores (Patri Campos, Iago Cerezuela e Carolina Regueira), reforzado polos departamentos de deseño, fotografía, edición audiovisual e redacción da empresa editora. Na súa carta de presentación, aseguran que "As Nosas pretende aportar unha visión de xénero que fomente na sociedade valores de igualdade, sororidade, respecto, superación, e competitividade sá".

Resulta evidente a necesidade e importancia dun medio que dea voz e poña en valor o deporte feminino. O deportivo é, probablemente, o eido informativo no que a representación de homes e mulleres é máis desequilibrada. En 2015, o proxecto de Monitoreo Global de Medios estimaba que nos medios españois só o 6% das noticias deportivas estaban protagonizadas por mulleres. Por iso, o Colexio Profesional de Xornalistas de Galicia  quere saúdar o nacemento de As Nosas. Porque, como di Belén Regueira, vogal da xunta de goberno, "o deporte feminino sempre foi de primeira, precisamos medios que o saiban".

CPXG