O DIRECTOR DA EMISORA EN SANTIAGO MORREU O SÁBADO AOS 32 ANOS

Traballadores de RNE en Galicia lamentan a perda de David Gil

[17/11/2009] O prematuro e inesperado falecemento do xornalista David Gil Mariño, que morreu a noite do sábado aos 32 anos dun fallo cardíaco, causou unha gran consternación tanto na súa cidade natal, Vigo, como en Santiago, onde traballaba como director da emisora compostelá de Radio Nacional de España en Galicia desde 2007, tarefa que simultaneaba coa de redactor e locutor.

Os traballadores de RNE en Galicia destacaron onte a "extraordinaria valía" do xornalista falecido. Nun comunicado, os seus compañeiros resaltaron que, pese ao cargo de director da emisora compostelá, "era un máis da redacción". "Así se consideraba el, así o considerabamos nós", indicaron, e engadiron que "era un exemplo a seguir para moitos. Deixa o listón moi alto a nivel laboral e, sobre todo, a nivel humano".

David Gil, nacido en Vigo en 1977, licenciouse en Ciencias da Información pola USC. A súa experiencia profesional comezou na delegación de Faro de Vigo en Tui (Pontevedra). Posteriormente pasou a formar parte de RNE, obtendo primeira praza na emisora de Ávila, desde onde se foi a Lugo.

David Gil recibiu onte sepultura na parroquia de Santa Mariña de Cabral, en Vigo.

EL CORREO GALLEGO
SANTIAGO

Outras novas